Stocks running low!

Feb 07, 2024 Dem Boys Seh, Features / Columnists, News

Kaieteur News – One former ‘big one’ open he liquor cabinet and realize how it running low pon stocks. He went to pick up the phone to call he businessman friend fuh replenish supplies when he remember that since he out of power, he friends them blank he out.

All of dem who used to kowtowing behind him suddenly disappear. When dem see he, dem putting dem head straighter than an arrow. He call out to them and dem play like dem nah hear.

Dem had one Minister he had one drinking problem. He out of power and de problem disappear. He find that nobody nah want drink with he and he liquor cabinet bare.

Is suh when you lose power. All who did know yuh before does suddenly become more scarce than Lysol during a pandemic. All dem wah used to buy yuh drinks nah even want see yuh around them.

Every Christmas all dem businessmen used to send plenty liquor to some of dem Ministas dat dem does have to share out to dem friends. Everybody sending something. But when yuh in Opposition, yuh plate bare and yuh glass empty.

Christmas time too de Ministers does get invite to plenty party. But when yuh in Opposition, yuh name does get scratch off de invitation list. Remember when things nice, everybody does know you but when things brown, yuh does mash dog dung.

Dat is why yuh does gat to know who are yuh true friends and who does only such up to yuh because yuh gat lil power.

 Talk half. Leff half.

• Dem Boys Seh, Stocks, Talk half. Leff half!