Mouth can seh anything. That is why some people does mek empty statements. Philip Bynoe open he mouth and talk how he bringing 400 people fuh picket de Waterfalls paper. Well dem boys seh that he woulda mek front page.
Whole day Tuesday de Waterfalls paper waiting. Dem had people to greet dem. By de end of de day de people suck dem teeth and go home because Bynoe didn’t do wha he mouth seh that he woulda do.
De Waterfalls paper go through a lot standing up fuh de Guyanese people suh nutten like threats, abuses and intimidation gun stop dem from wha de Creatah send dem to do. That is why dem gun continue to dig and dig to get to de bottom of de corruption.
But is de people who leading we who got people talking. Imagine that de government instead of defending de Guyanese people decide to defend de foreigners. And to mek matters worse de government resorting to terror tactics. It got to be that dem running scared.
In case people want to know wha gat dem frighten, is de dutty deals that dem do and dem frighten that dem deals come to light. That is why dem clutching at anything. Imagine dem lean pun a man like Bynoe. That surely show that dem clutching at straws.
De thing is that dem is de ones who benefitting from de foreigners in de logging companies and dem don’t care if de country ain’t get nutten. That is not selfishness. That is corruption of de highest order. Dem is de people who does get jail in any other country. Dem boys seh that de time gun come when Guyana gun get like dem other country and jail all de corrupt politicians.
De people who running fuh defend de foreign logging companies get kickbacks, kick up and kick front, while de Guyanese people get kick down. Dem boys hear that in nuff cases people collecting US$10,000 and some collecting US$20,000 fuh each shipment of logs.
Is about de same price dem collecting fuh visas and foreign work permits. That is why Rohee believe that dem boys ask dem Chinee people fuh something. He know that dem same Chinee people busy sharing out money. But de Creatah bless dem boys wid a contented mind. Dem satisfy wid wha dem got and dem does share it wid de workers, because dem is de people who does mek de money fuh de Waterfalls paper.
De government, on de other hand, tekking money from these same workers and de Guyanese people fuh pay de thugs dem hire. Imagine that dem pay $40,000 fuh every person dem bring out of de interior that using dem vehicles fuh help defend de foreign logging companies. Dem pay $10,000 to de poor people who travel on Bai Shan vehicles. Is a pocketpiece fuh buy lunch dem tell de people.
Dem boys want to know what else dem plan to do to de Guyanese people. Of course dem quick to bring lawsuit against de Waterfalls paper, but that ain’t gun stop dem boys. For too long all of dem drawing down and fulling dem pocket and any other place that got a hole. This got to stop.
Talk half and know that this is de worst de Pee Pee Pee get in dem 22 years in power.
Jun 06, 2020By Sean Devers Regarded by many in the local Rugby fraternity, including National Captain Jamal Angus, as the best teenage Rugby talent in Guyana, fly-half Tyrese Prescod seems well poised to...
Jun 06, 2020
Jun 06, 2020
Jun 05, 2020
Jun 04, 2020
Jun 04, 2020
Editor’s Note, If your sent letter was not published and you felt its contents were valid and devoid of libel or personal attacks, please contact us by phone or email.
Feel free to send us your comments and/or criticisms.
Contact: 624-6456; 225-8452; 225-8458; 225-8463; 225-8465; 225-8473 or 225-8491.
Or by Email: [email protected] / [email protected]