Dem boys seh…Thiefing mek ERC shut down
De Ethnic Relations Commission shut down. De people gone home. Dem ain’t get pay and de bishop blaming de Waterfalls paper because he ain’t get de money from de libel suit. But dem boys seh that is two people really vex. One of dem is de man who mek de opposition bruck up de ERC and de other one is a woman who lef she husband because of de man.
Now things get tight. De man got to push he hand in he pocket fuh support she because he can’t use de ERC money no more. Is that really mek dem cut de vote because most of de money use to go to personal use. People use to tek de money and carry he women to dinner while de big lady had to stay home.
De thing that got dem boys thinking is how de people get send home. Dem ain’t get no letter. All de big lady tell dem is to go home because dem ain’t get pay. Is like if she sending dem to protest. But is de same ERC that fund when Jagdeo had he Appreciation Day. All that money coulda deh fuh pay people.
But that does happen when people siphon off money fuh dem own use. Is de ordinary people does suffer. And now that de ERC close down de big ones still getting pay. And even if dem didn’t get pay dem did tek enough fuh last dem till dem dead.
But while de ERC people ain’t get pay dem who wukking wid Gee Nah and Hen See Hen get pay. And de ERC people vex because some of dem did join wid de two of dem to protest. But while dem don’t have money who paying fuh de fuel that de lady at ERC driving? Is ERC car.
Dem boys seh that de lady claim that if Bharrat can still drive de car from Ohh Pee she can drive de ERC car. Well she got balls like Jagdeo. That is wha dem boys seh.
Talk half and cuss de bishop