De AG settling wid everybody

Jul 22, 2016 Dem Boys Seh, Features / Columnists, News

Nuff people sorry dem didn’t sue de PPP because all who sue getting money. De new Attorney General know that de government couldn’t win de case because de PPP use to spite people who didn’t co-operate.
And when dem get vex all de government use to do was refuse to pay. You could get de biggest court judgement de government simply wouldn’t pay and nobody could lockup a government. Nuff people cry and some of dem nearly die pauperised.
When de government bun down de hotel wheh Blackie was hiding dem refuse to compensate de Dem boys she owner. De matter got to court. De Attorney General reach a compromise wid de hotel owner and yet de government refuse to pay.
De man eventually get some money and he had to tek less that wha de court order. But even before he get pay he had to agree to tek a cut. De man end up saying that before none, any.
But dem boys seh that nuff of dem did know that dem government would change and that de new government got people who ain’t bad minded. That is wha BK do.
A foreign company did do de same thing. It sue de Jagdeo government and get US$6 million. Don’t ask; de PPP didn’t pay. Is when Soulja Bai tek over that de people get dem money.
BK cut a deal. He tek less than wha he sue for. And de man even decide to tek de money in installments.
Well dem boys decide to sue Soulja Bai fuh settling wid everybody. He got to settle wid dem boys because dem did ask him to jail de people who did mek dem hand fast when dem was in government and he ain’t do it.
By not doing it he dash dem boys hope and mek dem suffer emotional harm and mental damage. He can’t tell dem boys he going to court because he is a man who always settle.
Talk half and watch how people gun settle Soulja Bai and he AG