Dem boys seh…King Bobby talk at last

Jun 13, 2013 Dem Boys Seh, Features / Columnists, News

Long before Bobby Ramroop come public that he buy de franchise fuh de Guyana team dem boys get de wink and dem talk. Bobby get shock because he couldn’t know how de story come out.
Now this is a man who own radio, newspaper, TV and even cable and he couldn’t put out he own news before anybody else. Dem boys seh that he had a reason. He had to wait till he partner come up wid he share of de money because is a question of trust.
Now if Bobby talk before he friend put in he money then he coulda cut out de friend and he alone would enjoy all de sweet from de franchise. That is why he wait till de friend land before he sign de deal. De man now claim how he gun name he franchise Limacol.
Is true that Limacol been in existence fuh ninety years but Bobby didn’t own de company then. He was still trying to scrape up money to buy it. But if he seh that he own it all de time, who can blame he?
Khurshid should ask he fuh de taxes but he an all frighten he own shadow and if Jagdeo pass by and he shadow deh pun de ground near Khurshid is fever and ague from fright.
Imagine dem boys hear that de Customs building sell.
Dem hear that is Mannie buy it but when dem ask Mannie de man seh that he ain’t even get invite to tender. When dem boys check dem ain’t even put out an advertisement. Dem boys seh that when Bobby buy de Guyana franchise dem didn’t put out an advertisement, too.
Bobby story come out. Perhaps is he buy de Customs building too.
Talk half and watch out fuh King Ramroop again.