Dem boys seh… Back pay mean death

Dec 11, 2009 Dem Boys Seh, Features / Columnists

Is not only Robeson Benn got a hammer. When dem boys see some hammer fall pun a business place on Wednesday is then that dem realise that is nuff man got hammer. Wha really happen is that dem had a war between two rich people. Both of dem claim to own de property but one was more bad than de other. The business people get ketch in de middle.
When hammer fall at Christmas people does get hurt more than when hammer fall at any other time of de year. But is de same Christmas save de business people.
Some of dem call pun Bharrat but he couldn’t hear. He been far. Dem boys seh that he did lock away in a room planning fuh Copenhagen.
But is not only Bharrat planning, wan wan people who wukking at Customs planning too. Some of dem arranging fuh smuggle in dem container. Dem gun land it in Berbice wheh dem boys hear de Customs don’t check too serious then drive it to town. De only problem is that if it too heavy it can’t cross de bridge and de boat got problem.
Nuff counterfeit money gun circulate at this time, too. Dem boys already see people mekking money fuh pass in a crowd when nuff people shopping and people eye light up at all that paper.
Dem boys seh that is only dem small business people gun get hurt. Dem glad fuh a sale suh dem gullible.
And next week dem public servants getting back pay. It gun be madness because some of dem done spend de money and now is pay time. And people don’t like fuh pay. Even City Hall and GPL don’t like pay.
Like dem contractor. Dem like collect, though.
Talk half. Lef half.