Google know all de rogues

Nov 11, 2014 Dem Boys Seh, Features / Columnists, News

People always know that is a set of rogue running de country. When dem had to go out and pay de school money to de children, was a set of rogues went wid dark shades and some even carry dem Common Entrance teacher fuh identify dem.
One is de Chat rogue who like talk out he head. Is he tell de Chief rogue, Donald, to prorogue de House.
Donald tell dem boys quietly when he hear de big word, PROROGUE, it had to be something good fuh Guyana. Is when he done mek he speech and he hear people protesting he ask dem boys wha it mean.
Dem boys tell he that de word pro rogue is shaat fuh professional rogue. De Shaat scamp was de rogue who spend de money although de people seh don’t touch it.
Then dem got de fat crook, another rogue, but a fat one, who finding money fuh done hotel and looking fuh bring two Chinee rogue, but dem smell Jagdeo, de rat, and run way.
Rohee, a no good rogue who using goat dung fuh see if he hair and mustache can grow, don’t even know he head from he toe, but want tun president.
Gail is another one. She talking bout people threatening de rogues. When she was li’l, dem boys hear she was hat and she mudda use to threaten she and tell she to stop behaving like a rogue. To this day she nevah change. And is because of Jagdeo.
He is de king rogue. According to Rohee, Jagdeo is de biggest thing de PPP ever see. Dis is de same man who get li’l belly wuk and spend millions of tax dollars fuh go to Miami to get a sturdy plug. Dat was to be a secret, but dem boys hear, just like  how dem boys hear that Donald didn’t believe de explanation dem give he fuh de word PROROGUE. Suh he Google de word and he get a shock when he see heself, Jagdeo and de whole Cabinet pictures under a banner mark professional rogues.
Talk half and check Google fuh yuself.