Jagdeo can stage ee own robbery

Sep 10, 2015 Dem Boys Seh, Features / Columnists, News

De police now finding out that nuff of dem robberies, home invasion and kidnapped are staged. Even dem murders not what some people would want de public to believe.

Tek de husband who shoot he wife in Berbice and seh how gunmen come in de blackout and shoot he wife while he was hiding in de bathroom.

De police ketch him and charge him fuh murder.

Dem had this Crabwood Creek man who want he wife feel sorry fuh him. De woman was leffing him and he didn’t mean to tek lef and allow another man fuh walk in suh he hire three men fuh come in de house and terrorise he and he wife,

He write a note to de men fuh direct dem how to beat him and wha dem must do to de wife. In de note dem boys read, he write how one of de men must seh, “Shoot he sk**; shoot he sk**” because de man want de wife to feel sorry fuh him.

Dem hear he get a sound beating but he wife get more than he. He then whisper to de men “I didn’t pay y’all fuh all that licks.” De police ketch this one too as well as de bandits who beat him.

Then dem got this worker who stage de $4.5 million robbery. He do this thing next to CID headquarters. He then lef and go to CID and report it. While he reporting it, an officer who pass and see him wid de bandit ask, “Is not you and that thief man I just see laughing and gaffing cross de road?” Right away he start sweat and de police know he lying.

Dem boys hear de police lef and go straight to de thief man house. Dem ketch de thief man wid de money. De thief man, Caesar de police seh, refuse to bear he chafe and spill de whole plan.

Jagdeo is another stage man. He stage a wedding wha half de country attend. He then tun round and seh that he never married.

He stage Donald term in office. When people believe that Donald was leading de country, it was de same Jagdeo.

Dem boys seh don’t be surprised if he hire he scampish friends dem to stage a robbery to thief out some of he assets fuh hide ee real worth and then invite de media to come and see what ee really own.

Dem boys want tell him that this is Guyana; whatever you think you do in de dark, does come to light.

Talk half and remind Jagdeo and he friends de jail cell dark.