Stick to wha you know good

Jul 26, 2018 Dem Boys Seh, News 0

People still watching de house wheh de police kill five men Tuesday. And dem still talking bout de shooting. Is now people hearing dat one of de men who get shoot was a good minibus driver.
Dem boys always seh dat people should stick to wha dem can do best. If you is a good cook, don’t try to be a tailor. A good minibus driver should stick to driving minibus. He ain’t got right going fuh rob and shoot police.
He mudda crying but she can’t seh nutten because he been at de scene. If he was somewhere else, she could seh dat he was going bout he business and de police kill him wrongfully. But put aside dis minibus driver, people want to know who gun have a safe in a house wid all kind of valuables and go away and lef it fuh a caretaker to watch. Dem criminals didn’t think. Of course, if de man want to hide money or he laundering money or he got drug cash, he can’t go to de bank. Perhaps dat was in de safe.
But dat start another story. Dem boys seh dat anybody who hear dat bandits attack dem house when dem ain’t deh gon run home to find out dat everything really alright. De homeowner ain’t come home yet. It look like he can’t get a plane.
De shooting over and done but is now some odda people talking bout it. Last week Jagdeo seh crime is really bad and he got to talk to Soulja Bai about it. Yesterday, he sit down and complain how if was he been in power, and dem men did get shoot, people woulda talk how is extra-judicial killing.
And dem boys want to know how de police respond so quick! People seh how dem been in de area. Dem boys know dat dis wasn’t de case. Anyhow, dem want to know wha deh in de safe.
Talk half and call de homeowner fuh keep a press conference. But he got to come home.