De richest and most powerful country in the world America deh pun a war path with nations because it trying to upkeep itself at the top.
Donald Trump is de man who heading de richest nation although it owe China more than anybody else and dat is wha got Trump vex because he can’t reduce de debt. Dat is how when he travel to Canada couple days ago he talk how Uncle Sam got a bad trade deal with some countries and dat got to change. He seh he country got to get a better deal.
From de time he talk, people start to seh how America sliding on the world stage. America is not America it use to be. Was a time when every Tom, Dick and Harrylall use to want to run to de States. Some people sell out dem property to pay fuh get a chance to go backtrack.
Dem who get ketch get send back fuh live pun de road. Some commit suicide yet Guyanese prefer to go there and do anything than stay in dis country. Now not even a maid want to stay deh because things more hard there than in Guyana.
Anyhow, Trump was de man who beat Hilary because he promise to mek America Number One. Dat is why he now picking war wid all ee friends. He start taxing everything dem sell to him. Friday, he went and fight with Canada, Mexico and the whole Europe.
He forget dat when you trouble marabunta you does got to run and lef de nest nuff time. Dem country was like marabunta. Now dem boys seh is a big trade war going on. Is tax fuh tax. He taxing Canada products and Canada taxing right back. Mexico and Europe in dat same boat too.
Everybody fighting fuh a fair deal; dem want de best offer. But dem boys seh Guyana live in a world all by itself. It look like it don’t know wha it want. And because of dat, de oil company and de gold company tekking advantage and de leaders smiling.
Is only pagalee people does do things like dat. Dem boys remember when people use to tek way dem children dollar and give dem a shine coin. Dat was what de children know. De coin was solid and de dollar was only paper suh de coin was more valuable.
Dem foreign companies come and do de same thing to Guyana but dat got to change. De Guyanese people want back dem dollar.
Talk half and wake up de coal-lay-shun…!
Oct 15, 2018Eagles Basketball Club and Pacesetters played both matches contested on Saturday at the Burnham hard court in the Second and First Division of the Rainforest Water/Malta Supreme/Georgetown Amateur...
Editor’s Note, If your sent letter was not published and you felt its contents were valid and devoid of libel or personal attacks, please contact us by phone or email.
Feel free to send us your comments and/or criticisms.
Contact: 624-6456; 225-8452; 225-8458; 225-8463; 225-8465; 225-8473 or 225-8491.
Or by Email: [email protected] / [email protected]