De best way to get anything out of anybody is to seh something good about dem. People get promotion and some people get fancy gifts all because dem talk nice about somebody. One consultancy talk good bout Guyana oil and Exxon run mad.
Exxon tek de statement and mek a full page advertisement. Is like when somebody holdup a banner big and bold wid dem photo pun it. Was like when Soulja Bai put he face pun some kite and share dem out to dem children.
When dem boys see de advertisement, right away dem know dat if a crappo did seh something good ‘bout Exxon, de woman who does talk wid de press woulda put on lipstick and powder pun de crappo and parade it through de streets.
Dem boys seh is not only Exxon stay suh. Jagdeo stay de same way. He get rid of some people who criticize him. Dem boys remember when Dr. Yesu tell him how he practice faulty economics. Jagdeo get suh vex, dat he order Khurshid to investigate all Yesu company. Was dig after dig.
But Kwame always talk nice bout Jagdeo, suh he get a house which he sell since de government change. Dem boys seh when people think about it, dem see de same thing wid some people in de Coal-lay-shun. When you talk good bout dem is sheer skin teeth, but mek mistake and seh anything bad.
Exxon gon vex wid Jagdeo. He refuse to talk nice bout de list wha de company release and seh is local content. Indeed, everybody know is a stupid list but dem didn’t expect de Coal-lay-shun woulda jump and support it. De government hold up de list and seh de Waterfalls paper in de thick of things wid Exxon.
Well dem boys seh Exxon only point out 227 companies, de Waterfalls paper does wuk wid 3,000 companies. It even feed money to Palm Court, Marriott, Pegasus. And dem boys ain’t count de gas stations wheh dem buy gas, dem ain’t count de taxis dem use and dem ain’t count de Chinee food dem buy, plus Church’s Chicken and de rest ah dem.
Talk half and bet dat de next list wha Exxon put out gon be a proppa list. Unless dem eyes pass de Guyanese people.
Aug 07, 2020Excited to chart new and successful era Just one day after being sworn in as the new Minister of Culture Youth and Sport, Hon. Charles Ramson Jr. met with the staff at the Ministry during a guided...
By Sir Ronald Sanders Amid the feverish work to cope with both the public health and economic effects of COVID-19 on their... more
Freedom of speech is our core value at Kaieteur News. If the letter/e-mail you sent was not published, and you believe that its contents were not libellous, let us know, please contact us by phone or email.
Feel free to send us your comments and/or criticisms.
Contact: 624-6456; 225-8452; 225-8458; 225-8463; 225-8465; 225-8473 or 225-8491.
Or by Email: [email protected] / [email protected]