When people develop a culture it does tek generations to change. Jagdeo create a culture wheh tekking bribe is acceptable, thiefing is a norm and bosses does shut dem eye.
Soulja Bai come in and he mouth shut overnight. As fuh he eye, he want some medication to see de corruption around him.
Dem new REO wha dem install only change party. Dem continuing wha de old ones use to do.
De one in Berbice buy a piece of junk fuh a bulldozer fuh de local authority. She pay $15 million fuh that scrap iron. That money coulda buy a brand new one.
When de story buss out de chairman feel shame and instruct de REO fuh send back de bulldozer and collect back de money de council pay.
Dem boys hear she can’t send back de bulldozer one year now because de man who sell is willing to give back de small piece he collect, but is wheh she finding de difference, especially if it done spend.
Dem boys got this odda REO who tek he neighbor and mek him ee driver. Then he give de man permission to sign off on fuel purchases and to pay fuh vehicle repairs.
He could tighten two bolt pun de wheel and collect $200,000. He can buy 100 gallon fuel and seh ee buy 10 drums.
Then he become de requisition officer. Two months ain’t pass and he tun de regional requisition officer.
Dem boys seh if wasn’t fuh de PAC he woulda tek over de entire Berbice. And by next year he and de REO woulda tek over Soulja Bai office and throw out he and Joe Shan Lin.
De one pun de Essequibo Coast is no different. He spend money wha govt voted fuh do one thing and he spend pun something else.
De govt tell him to tek de money and build two bridge and put some computers in some schools.
Instead, he tek de money and buy lipstick fuh he wife and food fuh he dogs.
Dem boys believe de coalition woulda bring about a significant change but day by day Guyana resembling de PPP especially under Jagdeo.
Talk half and hope and hope some REOs join Lula soon.
Oct 15, 2018Eagles Basketball Club and Pacesetters played both matches contested on Saturday at the Burnham hard court in the Second and First Division of the Rainforest Water/Malta Supreme/Georgetown Amateur...
Editor’s Note, If your sent letter was not published and you felt its contents were valid and devoid of libel or personal attacks, please contact us by phone or email.
Feel free to send us your comments and/or criticisms.
Contact: 624-6456; 225-8452; 225-8458; 225-8463; 225-8465; 225-8473 or 225-8491.
Or by Email: [email protected] / [email protected]