Latest update April 1st, 2026 12:40 AM
Latest News
Donald sorry fuh Lula; Sam sorry fuh Jagdeo
Donald Dumb now showing ee true colours. People never believe he was a thief or a scamp but dem always seh show me yuh company/friends and we gun tell you who you are.
Lula, de most popular ex-Brazilian president gone to jail. He get 12 years fuh corruption and thiefing. He still got 10 odda thiefing charge going on in de courts.
Donald know all dis, yet he write a letter in de press cussing de Brazilian judges fuh jailing Lula, dat scamp.
Dat alone show ee colours and now dem boys fully understand why he never try fuh jail or jail a li’l thief man much less a politician.
Is now dem boys know he fool dem because when he was running fuh de presidency ee give dem boys big high five and promise fuh jail all de scamps de fuss week he go in.
He even tell dem boys dat he know Jagdeo and all de kavakamites was scamps and how dem eating up and sharing out Guyana.
Everybody know he nah do nutten bout corruption although he had all dat fat talk before he go in. Matter of fact, dem boys believe he get sweeten wid it like when fly fall in molasses. He should go to jail like Lula.
All over de world, corrupt leaders going to jail. Last week, de ex-South Korean president, Park Guen-hye get send to jail fuh 24 years fuh tekking things wha ain’t belong to she.
Brazil Lula get 12 years a few days ago fuh de same thing wha she do and he still facing 10 more corruption charges. Dat could add 10 more 12-years sentences to his jail term.
De amount of jail he gon get, it gon tek he children and he grandchildren to help him serve it.
As fuh Jagdeo, Lula buddy padnah, he gon be facing 36 years because he do more than Lula and Park. Dem boys seh suh.
He tek; he give he family; he give he friends. Dem boys hope dat when he get jail, dem same friends and family gon help him serve it. Lula got pickney and grandpickney; Jagdeo ain’t got nobody.
Sam gon get jail fuh being stupid. He gon get at least 48 days fuh being blind; and Donald gon get double wha Sam get, fuh being dumb.
Talk half and watch how dem boys dreams coming through.
Discover more from Kaieteur News
Subscribe to get the latest posts sent to your email.
Similar Articles
THE BLUNT OF THE DAY
Sports
Features/Columnists
Sir. Ronald Sanders
The GHK Lall Column
Weekend Cartoon
