Soulja Bai got to build a new jail

Jul 10, 2017 Dem Boys Seh, Features / Columnists, News

When a prisoner warden got to think bout he house and he family and when he gun go home at de end of the de day, a prisoner got 24 hours a day just thinking how to get away from jail. Imagine a man get eighty years; is he whole life he got to think how he gun get out.
Yesterday, nuff prisoners put all dem thinking into action. Dem boys always seh that prison wardens gun cause de death of dem mattee.
Dem does smuggle things inside de prisons. When dem got a raid and dem seize all dem phones and jookahs, dem same prison wardens does sell back de phones to de prisoners. Some does do more than that. Ganja and anything does get sell in de jail.
Some of dem tek things too far this time; dem sell guns to dem prisoners and that is how one of dem get shoot and kill. If anybody should get charge fuh murder it got to be a prison officer. Now five prisoners at large. It coulda been seven but two of dem get shoot when dem try to get away.
What really got dem boys worried is that a man who been pun death row actually get away. This man get condemn fuh killing thirteen people in Lusignan and another twelve at Bartica. He gone. If dem ketch him dem lucky. This was a man who was planning all de time.
Dem got another getaway expert. He get away from de police at Mackenzie and he get away from dem in town. When he get ketch is because de police in Suriname hold him. Dem boys don’t think he going back to Suriname again.
But dem have another problem. Soulja Bai got to find a new jail because this one bun down. Ever since Gajraj, de government never want to build a new prison. Now dem don’t have a choice.
At least dem can now move de prison out of town.
Soulja Bai, de prisoners don’t have to sleep in de rain or tek de sun. Tek back de Sanata Complex. It big enough of keep all of dem.
Talk half and wonder if this jailbreak gun be like de one in 2002.