People does talk bout de tail wagging de dog when de junior or de servant decide that he is de master. Soulja Bai is a quiet man. He don’t micro-manage like some people. He don’t got people frightening him like everybody, even Donald Dumb, use to frighten Jagdeo.
Dem boys remember when de air traffic controllers ask fuh a pay increase. Dem was wukking short staff and dem had to work long hours. Dem decide to ask fuh more pay and when de government decide to ignore dem, de people call a strike.
Jagdeo is a man who does always travel suh when de air traffic controllers call a strike Jagdeo was returning from one of he overseas trips. De man was so bad that dem same air traffic controllers call off de strike as soon as Jagdeo land. And Jagdeo tell dem that if he did ketch dem striking he would send home all of dem.
Now dem gold miners wukking fuh dem own money. Dem using de government land and dem get duty free concession fuh nuff of de things dem use. Now de River man Jordan ask dem fuh pay a small piece more and dem vex.
Dem give Soulja Bai an ultimatum. “Meet wid we in two weeks or else…” De tail start wag de dog till one of Soulja Bai people ask dem wha dem gun do if de man ain’t meet wid dem. One of de miners send and tell de man that dem gun suck Soulja Bai big toe.
But dem right fuh tek dem eyes and pass big people. De same big people hire nuff of dem old friends to wuk in nuff office. Then dem tun round and sending home some people on de grounds of old age. Some of these people who getting send home younger that some of dem on de job. Dem boys seh is double standards. AND dem seh dem not talking bout first standard or de National Bureau of Standard.
Talk half and watch some people in de Palms apply to de government fuh wuk.
Oct 23, 2018Two helmet-tricks, three hat-tricks and an equal amount of doubles were recorded on an eventful opening day of the Third edition of the East Bank Football Association / Ralph Green Under-11 League...
Editor’s Note, If your sent letter was not published and you felt its contents were valid and devoid of libel or personal attacks, please contact us by phone or email.
Feel free to send us your comments and/or criticisms.
Contact: 624-6456; 225-8452; 225-8458; 225-8463; 225-8465; 225-8473 or 225-8491.
Or by Email: [email protected] / [email protected]