Jagdeo deny he own poop

May 06, 2016 Dem Boys Seh, Features / Columnists, News

Li’l children does be quick to deny doing anything. If dem in a house wid dem brothers and sisters and dem mother ask is who do wha, all of dem does seh, “Na Me”. Even when is something good dem does holler, “Na Me” because dem accustom to lie.
Tek de case of de time when a man go in de toilet and come out. Jagdeo been in and come out. He was standing outside. This man go in and come out and ask, “Who been in deh just now?” Right away Jagdeo holler, “Na Me.”
That is when de man seh how he find a wallet wid nuff money. Jagdeo slap he pocket and realize that he wallet drop. He can’t claim de wallet because he seh didn’t been in de toilet. The thought of losing he money mek he belly tun up and grumble.
Dem boys seh that over de years and during all dem travel dem realize that different people does behave differently. When gas slip out from an American he does seh, “Excuse me.” When it happen to an Englishman, he does seh, “Pardon Me.” When it happen to Dutch man he does seh, “Forgive me.” When it happen to Jagdeo, right away he holler, “Na Me.”
If anybody listen to that man dem would believe that he never do nutten. Tonight he going to some Town Hall meeting at Naresa Place.
De people invite dem boys to meet at Rockaway Boulevard in South Ozone Park, New York. Jagdeo is to be de keynote speaker. Dem boys seh that de only key Jagdeo can deliver is de key to ee mansion at Pradoville 2.
Dem Boys gun ask Jagdeo bout de radio licence wha he give away and he gun seh ‘Na Me.” Dem gun ask him about de property wha Babbie get and he gun seh, “Na Me.” And when dem boys gun ask he if Soulja Bai should jail all he friends and cronies, de man gun seh, “Na me, though.”
Talk half and remember that is not only Peter deny.