Tennis Roll mek Rambo talk good things on TV

Apr 22, 2016 Dem Boys Seh, Features / Columnists, News

An old pastor tell dem boys ‘You may not be able to control someone’s attitude/behavior but you can control how long you participate in it.”  That is so, so true.
A man name Rambo like a hurricane. He destroy nuff thing. He nearly destroy de Pee Pee Pee until that scamp Jagdeo chase him like a dog.
This was de same man who nearly destroy GPL when ee nearly knock off everybody and lef heself and ee son fuh run de place.
Anything he put he hand pun he destroy. From GPL he go and wuk wid a doctor and de man nearly dead. Then he go and wuk wid Bee Kay. Ee nearly mek Bee Kay run bankrupt.   Subsequently Bee Kay give him de marching order.
Nobody ever hire him back so he was hungry. Govt change and ee stretch ee tongue out. Joe ShanLin and Bee Kay snatch it because dem know he like run wid he tongue.
De other day dem boys hear he get some tennis roll and salara from dem two that snatch him.
Everybody know wha does happen when you belly full. Some people does drop asleep, while others does talk out dem nonsense. Rambo is one who is known to talk out he head. Imagine wha does happen when he belly full.
He been pun TV and he cuss de Waterfalls paper because de boss refuse to buy salara for him. He sit down wid de Ram, cuss Goolsarran, cuss Rum Jattan, and talk nice things about Bee Kay and Joe ShanLin.
Nobody ain’t got to explain nutten else. He who pays de piper calls de tune. He who full Rambo belly control ee BT (Bathroom Toilet).
He talk so much that people began to think that Joe ShanLin is a pastor and Bee Kay is a pandit.  Dem boys seh don’t be surprise if you hear Rambo tun lead adviser to Soulja Bai or he tun manager fuh Bee Kay business.
Talk half and open keep some food Rambo