Politicians are thieves

Mar 01, 2016 Dem Boys Seh, Features / Columnists, News

Politics is nuff. Politics is everything. A man name Oscar seh ‘Politics’ is de gentle art of getting votes from de poor and campaign funds from de rich by promising to protect each from de other.
Dem boys convince that de scamp, Jagdeo, and Donald Dumb, ain’t got nutten close to being gentle in dem. If dem had dem woulda still be sitting in de chair that Soulja Bai occupy.
Dem tek campaign funds from de people and dem boys seh dem tek from de state, too. Wha dem politicians do wid de funds wha dem collect from de rich and from de state, dem boys ain’t certain because dem ain’t went far in school. But dem boys believe dem pocket some.
It is clear as day that politicians does thief. And Soulja Bai might wake up in de street only to realize that dem gone wid State House too.
Dem boys hearing that some of he coalition people start thiefing already. Dem boys plan to document everything. Dem done see some of dem fingers got paste pun it.
Blackman fingers had paste too but Uncle Sam paste him up before de plane tek off. Only de Maker and Babbie, Jagdeo best friend, know wha he was coming here to do wid drugs.
He paste up in a jail cell and he praying and asking de Maker why Uncle Sam couldn’t have a Chang and a PPP DPP fuh unpaste so he could walk about free.
De Hambassadah tell dem boys that Uncle Sam got plans fuh Blackman, that when dem done wid de him, ee gun look like Hammie—shaat and stumpy, old and grumpy.
Talk half and thank Uncle Sam fuh tie dem and paste dem up.