People can’t believe Jagdeo

Jan 30, 2016 Dem Boys Seh, Features / Columnists, News

This nation really need a proppa opposition, one that can mek de people believe de words that coming out dem mouth. De present opposition was in govt fuh 23 years. It do everything under de sun and on earth.
Dem was so good that today dem deh in de opposition and is Jagdeo, that scamp got dem deh.
He was de one that bring VAT and mek everything went sky high in this country. Dem poor people holler, cry and bawl just fuh Jagdeo and dem other scamps reduce de VAT.
Jagdeo lef office and Donald Dumb tek over. De Dumb, in his campaign, tell de nation that if dem give him a chance he  gun reduce de VAT.
That is how he barely get in de govt. He get kick out and de VAT still remain de same way.
Months into de new govt and de way Jagdeo, that scamp, and he Pee Pee Pee followers behaving fuh chop de VAT you would believe anybody who don’t know de truth would believe that de new Coalition Govt are a set of heartless SOBs.
Dem boys want to know how can any Guyanese, more so de Pee Pee Pee supporters believe anything that come out from Jagdeo and de Pee Pee Pee mouths.
Is only after de elections people get fuh know who was de real owners of de Berbice Bridge and who was calling de shots and setting de price fuh dem poor people fuh cross de bridge.
Is only de other day dem boys learn how much dem use to pay fuh drugs wha does give away fuh next to nutten.
Jagdeo friend who use to bring in de drugs, when questioned seh that he job is fuh call price and who want it can tek it.
Well dem boys got a slang fuh he. Dem seh he can come and reverse in front of dem and if he want it he can tek it. He can bring Ravi de Devil.
Talk half and find a new opposition.