De fat crook, de shaat scamp and Jagdeo must go to jail

Dec 16, 2015 Dem Boys Seh, Features / Columnists, News

Brassington tek US$5 million from GNCB to help build de Barriott hotel. Jagdeo and de Shaat scamp know bout de money and dem know when he tek it.
Dem boys not certain if is dem same two tell him to tek it. Wha dem boys certain about is that he didn’t put it in de Barriott, he hide it in a secret account.
If de govt didn’t change that woulda been another set of money gone in dem overseas bank account. Dem boys plan to talk bout overseas bank account another day.
He didn’t have to pay any interest pun de US$5 million he hide. Hear wha he do Guyana; he borrow US$15 million from Republic Bank fuh put in de Barriott and got de Guyanese paying fat, fat interest.
In a layman terms let dem boys explain wha Brassington did wid that US$5 million. Odinga family house falling down and it will cost $10 million to rebuild. He go to he eleven brothers and sisters and tell dem “Let’s pool our money to rebuild de house.”
All dem come up wid is when dem done pool was $3 million. Dem Daddy who live in America hear wha dem plan to do suh he give Odinga, de big brother, $3 million to assist.
Odinga ain’t tell none of he buddy and sissy bout that money and he hide it away.
So when dem done spend dem own $3 million Odinga tell dem “We gat fuh go to de bank fuh a $7 million to finish de house.”
Dem tek de loan and lef demself wid a big interest when Odinga coulda put in de $3 million and dem woulda only got to tek $4 million and pay a smaller interest.
That is wha Brassington do all Guyanese right now wid de Marriott.
Talk half and decide wha to do wid de fat crook.