A bad man deh pun stupidness

Nov 22, 2015 Dem Boys Seh, Features / Columnists, News

Some people does really do stupidness and when other people talk dem does get vex. Imagine six months barely pass since de new government get into office and already people talking how some of dem just like Jagdeo and he boys.
That is not a nice thing to say but dem boys want to know how come a man can build a place over de seawall and after he do that he decide that he gun expand pun what he build. De smart thing is that if he had to build that place pun land de amount of money he would have to spend just to buy a piece of land would cost him a fortune.
So he go over de seawall and he build this place that is a night spot. Jagdeo didn’t tell him nutten so he decide that if he can build one he can build two. Is then de sea defence people move to stop him. But when you got friends in high places, nobody can’t stop you. De court paper was meaningless so de night spot people continue.
De new government come in and de man do more. He drive a front-end loader over de wall and he cut down couple courida trees. Dem, boys seh that he and de AG is good friends so he ain’t frighten any legal action. De AG will stop all.
But old people got a saying that wha sweet in goat mouth gun be like fire in he tail. This man didn’t have to worry when de Chat-3 was de AG. Now he claim that he don’t have to worry wid this AG.
Soulja Bai deh in he corner like nobody’s business because he think that he Ministers gun do what is right. But some people gun get a rude awakening. When Soulja Bai get vex he can be like bass broom. He can clean out anything.
Dem boys seh that somebody better send a bulldozer to this place over de seawall.
Talk half and watch how de seawall gun get important