Imagine Granger had a fridge that was wukking. He decide to get a bigger one suh he hire Donald fuh fix up this big fridge. But Donald know bout TV. He never fix a fridge. Donald tek $100,000 fuh do de wuk. But fuh some reason de fridge never wuk good. Donald hand it over and Granger tek it.
Things spoiling in de fridge and Granger decide to call Donald. He can’t find Donald nowhere. But he find Donald when he stove did want fixing. He advertise and Donald tun up. Granger either had to be a scamp, had runnings wid Donald or plain stupid because he give Donald that contract, too, fuh another $100,000.
If that sound like a joke, dem boys want you think wha happen wid de Skeldon sugar factory. De company wha build it never build one and when dem hand it over to de government it wasn’t wukking good. It still ain’t wukking.
Dem boys remember when Rob de Earth was de Minister. When dem ask bout Skeldon he tell dem how he suing de company. Was nuff talk and nutten bout talk because he boss Jagdeo give de same company another contract.
Wha surprise dem boys was that de company was more dear than de one from India which build more sugar factories that dem got flies following dead dog. Why Jagdeo pick dem ain’t had to guess. If you want protect you money de best people to keep it is dem who paying you.
Dem boys sure that just like how dem cricketers does have dem money in foreign banks and not all in dem own bank, is just suh nuff government people got money in foreign banks. Dem boys willing to bet that none of dem got money hide away in America. De money deh in India and China.
Every month de arrangement is fuh de foreign bank to transfer some money to de local bank. Dem should have a law fuh people to explain why de money coming in every month. And dem boys seh that dem ain’t talking bout mother-in-law; father-in-law, son-in-law or daughter-in-law.
Jagdeo ain’t got none of dem in-law. He got a special in-law though. De Germans seh that got dieb in richt. Fuh dem people who don’t know de meaning of that phrase, it mean thief-in-law.
Talk half and thank de Germans.
Dec 14, 2019CHENNAI, India, CMC – Despite a recent disappointing record in One-Day Internationals, assistant coach Roddy Estwick believes the signs are there that West Indies are about to turn around their...
Editor’s Note, If your sent letter was not published and you felt its contents were valid and devoid of libel or personal attacks, please contact us by phone or email.
Feel free to send us your comments and/or criticisms.
Contact: 624-6456; 225-8452; 225-8458; 225-8463; 225-8465; 225-8473 or 225-8491.
Or by Email: [email protected] / [email protected]