De waterfalls boss man want ketch Babbie and he best friend

Feb 11, 2015 Dem Boys Seh, Features / Columnists, News 0

When a man pocket full money does fall out, because de pocket ain’t got no more space. It so happen that this time some people got more money than dem can count. Couple morning ago, people use to collect every cent dem can put dem hand on. People scramble till some of dem break dem fingernails.
Now that Donald announce elections, he tell dem that dem got to stop tekking and thiefing. He tell dem that de government got to present an image that mek dem look like decent people. And he lead by example; he drop de price fuh gas suh people start fuh fill up dem car more cheap.
Then he decide fuh give de people cheap current because he people mek too much from light bill. Even de people who thiefing current got to get some incentive. Dem boys seh that GPL promise to give dem people who thiefing current a longer piece of wire.
Dem boys notice that from de time Donald announce that he gun cut light bill, some blow blow come out and sing from de rooftops that de mighty Donald bring blessings. Clinty de Willie is a Christmas blow blow who holler that de cut is de best thing since Noah mek de ark.
Ramesh Coo Coo is a Phagwah blow blow and Bibi Shades is a Eid blow blow. De two of dem claim that dem can now get money to spend pun sweetie and chewing gun that can blow real big.
Well since dem like blow things dem boys got nuff things fuh dem blow and keep dem mouth busy.
Dem boys got thing fuh keep Babbie and he best friend busy too. De two of dem know that de Waterfalls boss man frighten to go to jail suh he cut a deal wid Cee fuh Satar. Wha dem don’t know is that de Waterfalls boss man frighten things other than jail. He frighten wha he would do to de two of dem if he ketch dem in a dark corner.
Dem boys seh that people can let dem imagination run wild because whatever dem can think, that is wha de Waterfalls boss man gun do to de two of dem.
Talk half and think more cheapness.