Dem boys seh…Jagdeo got plans fuh heaven

Jan 12, 2015 Dem Boys Seh, Features / Columnists, News 0

Old people seh that dem got different ways of thiefing. Some does thief and seh dem tek and when dem get ketch dem does put back. Sometimes de court does mek dem put back or pay back.
If you look stupid you gun get rob; if you carry youself careless you gun get lash down.  De whole of Guyana full of thief man. People thiefing all about. Dem thiefing from de stores, dem thiefing from other people.
Dem boys remember when one Secretary to de Treasury before Rekha carry facts that people thiefing to Jagdeo and de man tun he face. De Waterfalls paper carry a story of fraud and thiefing in Customs. Jagdeo call de boss man and ask if he got proof. When de boss man carry de file to Jagdeo in he office, he open it and all he do was smile as if fuh seh, “Leh de people thief.”
Instead of tekking action, Jagdeo give back de boss man de file and tell he fuh carry de file and give de GRA head. To this day nutten happen and is business as usual. Was millions of dollars involve.
People see nobody getting charge in this country fuh mekking dem hand fast so everybody trying fuh get rich overnight. Who don’t put dem hand in de treasury and people drawer, putting dem foot in people house. Some big ones keeping dem eye pun state assets and in de whole treasury. Ask Jagdeo, Brassington and de Bees plus Ashni wha happen to all de state assets and contracts.
Dem boys hear that in almost every state institution thiefing going on. It suh rampant that de opposition asking Ashni Singh fuh justify wheh $4.5 billion from de treasury deh. And Anil seh that dem don’t have right to ask.
Dem boys seh that de politicians behaving like if is dem Mooma money dem spending.
People thiefing from de courts and once dem is a small one, dem getting charge but even then nobody don’t get convict.
Things meet at such a stage wheh thiefing has become de norm— a way of life and that is very sickening for future generations. Decency has gone through de window. Truth went out de backdoor.
That is how dem boys hear that Jagdeo plan fuh thief if he ever get into heaven.
Talk half and hope hell collect he and he kavakamites.