Latest update April 24th, 2024 12:59 AM
Oct 22, 2014 Dem Boys Seh, Features / Columnists, News
Nobody like fuh tek blame. Most people who get catch does either run and hide or point at somebody else. And even if is deh best friend, dem does end up dumping them.
Is like de GuySuCo man who slap he boss at Skeldon. He get dump de same night. De workers strike, de factory shut down and de whole country get blackout. GP-Hell seh is not dem fault. Dem dump de blame pun de workers who strike.
Dem boys see a whole lot of dumping going on lately.
Dem Chinee workers at Marriott decide that dey backyard deh right in de Atlantic Ocean. Dey know anything goes in Guyana. Dem know that de big boys, like de Bees, got dem back…because dem all in de ting together. So dem start dumping waste oil by de seawall. Lucky ting two tourists see dem and tek pictures and videos. A good Coast Guard rank, who was doing some dumping in the outhouse, pull up he pants halfway, run over and tell de Chinee people to stop dey dumping. Dem refuse to shake he hands.
Recently de Sports Ministry dump de kantractah who suppose to mek de pavilion and guard hut at Leonora. Dem seh de man did wukkin too slow. That is when all de trouble start. When de Ministry try to collect from de insurance people who guarantee de wuk, nothing happen. De Ministry dump dem in court.
A couple weeks back, Bheri Bheri decide that he ain’t tekking no blame fuh be specialty hospital. He seh that de Surendra people submit false bank guarantee. That kantractah done walk away wid millions. Bheri Bheri dump them and now de Govt. suing fuh get back de money wha dem overpay.
Surendra just like Fip who tek plenty money fuh build de roads to Amaila and then Donald dump he as soon as he become President.
Deh gat one more big dumping fuh tek place. Cee fuh Satar decide he want to finish off dem boys. He send some emails and some BBM and Whats App message. Now all he friends dem who he tell that they in this thing together, dump he.
Dem boys know nuff ah dem frighten wha gon come out. Nobody want to see wha documents dem boys got to reveal. Is a whole lot. Dem boys waiting fuh dump it pun dem.
Talk half and watch out fuh de dump truck.
LISTEN HOW JAGDEO WILL MAKE ALL GUYANESE RICH!!!
Apr 24, 2024
Round 2 GFF Women’s League Division One Kaieteur Sports – The Guyana Police Force FC on Saturday last demolished Pakuri Jaguars FC with a 17 – 0 goal blitz at the Guyana Football...Kaieteur News – Just recently, the PPC determined that it does not have the authority to vitiate a contract which was... more
By Sir Ronald Sanders Waterfalls Magazine – On April 10, the Permanent Council of the Organization of American States... more
Freedom of speech is our core value at Kaieteur News. If the letter/e-mail you sent was not published, and you believe that its contents were not libellous, let us know, please contact us by phone or email.
Feel free to send us your comments and/or criticisms.
Contact: 624-6456; 225-8452; 225-8458; 225-8463; 225-8465; 225-8473 or 225-8491.
Or by Email: [email protected] / [email protected]