Dem boys seh…Brazzy alphabet seh ‘J’ is fuh jail.

Aug 24, 2014 Dem Boys Seh, Features / Columnists, News 0

Dem forestry people playing games and dem getting find out. De other day dem mek a lot of noise bout how people break into dem lawyer car but now dem finding out that no laptop didn’t get thief. Everything was a plan to mek de Waterfalls paper get blame because dem believe that dem boys woulda stop reporting.
Dem had other plans too. One plan was fuh change de alphabet wha had li’l children saying ‘A’ is for apple and ‘B’ is for bat. De fat crook change it to seh that ‘A’ is for Amaila; ‘B’ is fuh Bai Shaan, and ‘C’ is fuh Cheddi Jagan International Airport. That was fuh indicate wheh de pocket money coming from.
Of course dem boys know all de other letter of Brazzy alphabet but dem can’t remember all of dem. Fuh sure dem know that ‘J’ is fuh jail wheh Brazzy and all of dem gun end up. Donald know that alphabet very good because he learn it from de time he hear de man who look like de devil use to say it.
De other day when dem boys couldn’t find he it was because he did stick up in de Mahaicony creek. He tek a boat fuh get away from all de confusion bout Bai Shaan and he stick up in de creek. He had to sit down deh because de boat run out of gas. It run out when dem was going and it break down when dem was coming back.
Somebody thief de money that was to buy de gas. Dem do de same thing dem does always do when dem got government project like road wuk and construction. Dem put a li’l bit of the money in de project and de rest gone in somebody pocket. Donald know that because he did tell dem boys that dem contractors cocking he and de government.
Ash Knee even seh that de government got to penalize dem engineer who got to supervise de project because dem got to see de substandard wuk. He even seh that de government don’t know bout de kok but dem boys can’t believe a word that any of dem seh. From de time dem open dem mouth is lie and that include Jagdeo.
Nowadays dem telling everybody that Bai Shaan doing everything by de book but of course as dem boys know, not one word is true. That is why Guyana need a Kamla. She is a woman but she got more nuts than Donald.
Talk half and remember de alphabet, ‘J’ is for jail.