Nutten that happen in this country can and should surprise people no more. Dem believe that dem see it all. Imagine, people who got a right to, and who getting pay to protect de people of this country’s interest getting vex when people question dem.
Nutten dem seh can be believed. Dem lie bout everything, from de logging in Kwebana to how much logs Bai Shaan ship. De forestry man claim how he can’t talk bout how dem people get duty free concession and how much. He seh that if dem boys want to know dem must ask Khurshid.
Khurshid seh that he does only act pun written request suh he can’t talk to de press.
De Bai Shaan thing raise so much question that no matter how much sweep dem politician try to sweep dem question away, more coming.
Clinty de Willie is a chairman of de body that represents dem manufacturers and de association tek a decision to ask Donald to release all de information that he could fuh let de people see that Bai Shaan ain’t doing nutten illegal. De letter wha de Board write end up in de press. No other member of de association ain’t get vex but Clinty de Willie get suh vex that he tun from black to red. It got to be that he bag heavy.
Dem boys want to know if he own Bai Shaan and he vex because people attacking de company. If he ain’t own de company he got to be enjoying some benefit because de man get suh vex that he nearly burst a blood vessel. He tun and tell de business people that he ain’t sending no letter. Well de other Board members had to mek he realize that he is only de president and he is not Donald. Dem ask he is by refusing to send de letter, he saying he no longer de President of the association.
That is when he tun like Brazzy and seh how he want confidentiality. Dem boys seh that dem ain’t surprise because he and Brazzy big alike.
If nutten ain’t wrang, dem boys want to know why in 2012 Norway cut US$20 million from de money it giving Guyana? Dem boys waiting fuh see how much gun get cut in 2013 and 2014. But something got to be happening. Norway giving Guyana US$50 million a year fuh five years. And that money got too much eyes watching it.
It got to be that dem foreign companies promise much more when de year done suh that dem in control pocket US$50 million and still got money to put in de treasury. De people protesting, and it bothering de foreign logging companies suh de people who enjoying de sweet see de money cutting and that getting people like Clinty de Willie get vex.
When people get criticize too much, dem does shame. That is why dem boys want to know how this bunch can live wid all de revelations day in and day out and continue like nutten ain’t happen. That is a big question.
Dem boys want to know wha dem does go home and tell dem wife and children. Dem know wha de Bees does go home and tell dem children. “Alyu happy, right?”
Talk half and study how much money really going to into people pocket.
Sep 18, 2018Story and photos by Zaheer Mohamed A well complied century by wicket-keeper batsman Kemol Savory backed up by a decent bowling performance handed last year’s finalist Essequibo a 90-run victory...
Editor’s Note, If your sent letter was not published and you felt its contents were valid and devoid of libel or personal attacks, please contact us by phone or email.
Feel free to send us your comments and/or criticisms.
Contact: 624-6456; 225-8452; 225-8458; 225-8463; 225-8465; 225-8473 or 225-8491.
Or by Email: [email protected] / [email protected]