De timber situation get out of hand. People start fuh talk and all of a sudden de government decide that dem gun terrorise all dem reporter who expose de story. When de story buss out and dem realize dem in fuh nuff nuff trouble, all of dem run fuh cover and stay quiet. Den after a few days dem get Bai Shaan fuh talk crap in a full page ad.
Dem boys talk bout shipping out lumber and how much Bai Shan Lin sending out and how Guyana getting nutten. Nobody didn’t talk bout investment. All dem talk bout Guyana getting a fair share from de logs it shipping out. But it seem that Bai Shaan telling Guyana once dem spend money, shut de f*** up and tek whatever “we do”.
De government get involve after dem boys start exposing more and more wha dem scamps doing in de forest. De last straw bruck de camel back when Donald come out and defend Bai Shaan. He didn’t even have de decency fuh seh that de government gun investigate de issue.
De government tek almost a whole week to respond. Rohee was one who seh that Bai Shaan didn’t give de Waterfalls paper wha it ask dem Chinee for. That tek de cake. Dem boys did expect Donald fuh ask Rohee wha nonsense he talking. Instead he didn’t seh nutten
He setting a new trend, because where he came from everybody knows it’s all about Freedom. He come out of Freedom House wheh he use to preach bout Freedom of Expression and things like that. Instead, dem now find out that Donald come from Free Dumb House wheh people stop and don’t talk at all.
At the last press conference dem boys hear he was walking wid a long statement from forestry. So dem boys decided not ask he anything bout that suh he didn’t get to read de statement. He had to remain Dumb.
Yesterday he got de forest man to call a press conference and to explain this whole fiasco. Everybody know that a press conference is fuh reporters. Instead dem invite people to abuse, insult, assault and intimidate reporters to mek dem stop talk about wha going on. And de leader was Phillip Bynoe, a big frighten man, a man who run and hide in de bush fuh five years because Jagdeo did want to jail he. He even hide from he wife and pickney when dem visit him in his hideaway camp.
Dem boys ain’t talking how he tun a snitch and mek several people get kill just fuh let Jagdeo pardon him.
Dem boys want to know how much Rob de Earth pay Bynoe. This man Bynoe now deh in de government pocket from de time Jagdeo pardon him. This same Bynoe did go to Ohh Pee fuh overthrow Jagdeo; this was de man who run and mek he friend, Mark Benschop, spend five years in jail while he hide like a pussy.
This is de same man who was in de Pee And See and who use to cuss Jagdeo. But de threat of jail mek he switch suh fast that some people wonder if he can ever be loyal to anything.
He tell de reporters, after abusing dem and spitting in one of dem face, that he coming fuh picket de Waterfalls paper. Dem boys want he come. De Waterfalls paper is not de forestry people. Fuh sure de paper ain’t gun pay he nutten. Instead, he might end up in de same jail wha miss he de last time.
Talk half and feel sorry fuh wha Donald become, liar like de man who resemble de devil.
Oct 23, 2018Two helmet-tricks, three hat-tricks and an equal amount of doubles were recorded on an eventful opening day of the Third edition of the East Bank Football Association / Ralph Green Under-11 League...
Editor’s Note, If your sent letter was not published and you felt its contents were valid and devoid of libel or personal attacks, please contact us by phone or email.
Feel free to send us your comments and/or criticisms.
Contact: 624-6456; 225-8452; 225-8458; 225-8463; 225-8465; 225-8473 or 225-8491.
Or by Email: [email protected] / [email protected]