Ever since Cuba introduce dem energy saver bulb to Guyana dem shop start fuh get rid of dem bulb that use to shine bright but drive nuff heat. But at that time dem was de bulb. People use to point out dem house wid bright light and seh that is a hundred-watt bulb.
Ordinary people use to use dem sixty-watt bulb. That is also how people use to measure who bright and who dunce. One day dem boys hear when Tony Vieira claim that Rohee is no hundred-watt bulb.
De other day after a press conference, dem boys seh that Rohee ain’t even a twenty-watt bulb fuh believe that all he rich colleagues save up dem money; that dem never spend even a cent and that is how dem get rich.
He got to teach dem public servants how to live pun de small piece that dem getting. He got to tell dem that if dem save dem can get rich like Jagdeo and Rob de Earth and all of dem who living like a king or a queen.
Ah Kneel was a rich man before he tun Hay Jee. Dem boys seh that it look like if he want more money suh he suing everybody. Now everybody calling he Sue Zee, or Sue, fuh short.
De other day he sue de Waterfalls paper because this paper talk how he, Sue Zee, got a good friend and that he does eat wid this friend six days a week. Chris Ram ask he why he sue and he get vex.
De mistake Chris mek is to write a letter and print it. Sue Zee now threatening to sue if Chris don’t go down pun he knee and beg pardon.
De thing is that de Chancellor trying to get rid of de backlog in de courts and Sue Zee adding to de backlog. He mekking sure that dem judges got wuk.
He also mekking sure that de people who deh in he chambers get a steady wuk. This is not de Hay Jee who send de letter threatening Ram but de letterhead come from de Hay Jee private office.
Dem boys seh that this is a senior Government officer who wukking two place. Donald got to check to see if any private wuk passing pun government time.
Talk half and help de Hay Jee decide if he is government or private.
Nov 20, 2019Hodge’ maiden ton goes in vain as Volcanoes lose by 22 run By Sean Devers in Trinidad In a game delayed by 45 minutes due to some showers a handful of fans watched Guyana Jaguars beat Windwards...
Editor’s Note, If your sent letter was not published and you felt its contents were valid and devoid of libel or personal attacks, please contact us by phone or email.
Feel free to send us your comments and/or criticisms.
Contact: 624-6456; 225-8452; 225-8458; 225-8463; 225-8465; 225-8473 or 225-8491.
Or by Email: [email protected] / [email protected]