Dem boys seh…De crooks getting ketch one by one

Jan 27, 2014 Dem Boys Seh, Features / Columnists, News

Everybody does try to fool dem boss. Some does fool de boss into believing that dem doing good and some does try to hide dem incompetence. De opposition tell Donald that dey mean to wuk along wid he and dem would like to be part of de budget preparation.
Up comes de shaat crook who tell Donald that he give de opposition all de relevant information. When de story buss out, he mislead Donald and mek de opposition think that Donald is a crook.
Dem boys seh that he ain’t de only one. Brazzy know de scampishness wha tekking place wid de Marriott. He know that dem ain’t got no foreign investor, that de money coming from all who thief de taxpayers’ money and want to launder it.
But he announce that he had a set of bank people and some special investor who gun hold de majority share fuh putting in less money than de government and de Guyanese taxpayer. De fat crook mislead Donald. He tell Donald how everything under control, then he tell de press that by de end of December all de money fuh de hotel gun done sign up.
De money done sign up but he mislead de man bout who putting in de money. Well December come and gone and de fat crook still can’t produce de special investor or de bank people.
Bibi mislead Donald bout de licence fuh de Linden TV. She tell de big man that Linden tell she that dem gun pick up de licence and that she done write it up. De truth is that she expect Linden fuh apply because she know that Donald wouldn’t ask she wha happen.
Rob Earth mislead Donald too and that is why he got to follow Ganga. He tek de taxpayers’ money from de budget fuh build some bridge and fuh dredge some trench fuh help dem people pun West Demerara. When dem boys ask how de project coming, Rob Earth seh that he spend $3.5 billion and that Bee Kay get de contract.
Under pressure, he carry in dem reporter then he lef dem in de backdam when dem ask he fuh show dem de project.
Donald asking he fuh show de money because he can’t show de project. Ganga couldn’t show how Osman woulda provide de money fuh de recycle project.
Talk half and watch how dem getting ketch.