Dem boys seh…Man from Israel spying pun Guyanese, Donald know

Dec 18, 2013 Dem Boys Seh, Features / Columnists, News

Rob de Earth deal wid Muri Brasil got more hole that a cast net and it mek Rob de Earth look more a robber. Pressure mek he come out to explain heself. He nah spend he money fuh explain he pocket; he spend taxpayers money.
De first thing he holler is that the dem request expressions of interest for proposals for a Permission for Geographical and Geophysical Survey.
From de time dem boys hear bout de expression of interest, dem mind flash to Sanata complex and many other things, including GT&T shares, de Marriott Hotel, de Specialty Hospital, de hydro road project wid Fip, and de airport expansion. And that is only some.
And fuh all de expression of interest, de Fat crook always holler that he is not bound to accept the best offer.
Dem did advertise Sanata nineteen times in de newspapers. But wha dem advertise was not what dem give to Bobby. He get more than wha been pun de plate.
In de end de whole of Sanata go to Bobby, and dem boys seh that Jagdeo got a big share inside. He had no offer at all, not even an expression of interest.
Rob de Earth seh that he ask fuh expression of interest when he advertise. He didn’t advertise fuh ordinary people see. He hide it in de Official Gazette. He and de company had to plan that suh nobody else coulda bid or express any interest.
Rob de Earth learn from de fat crook, Brazzy, who close to Jagdeo, and Rob de Earth also close to Jagdeo.
Now this deal wid Muri Brasil, dem boys seh that Rob de Earth got a share.  You decide wha size of share he got.
Dem boys seh that nutten is secret in this world. Even de Creator does whisper some of de times in dem boys ears when people get dumb. He whisper to dem boys last night that De government bring a man from Israel fuh listen in to people conversation pun dem phone. Donald know bout it.
Dem boys want dem fuh know that dem can listen.  And dem boys hope that dem heart good, because dem who listening got wife and dem boys deh pun a clean-up campaign fuh Christmas. Dem boys ain’t got kinna.
Talk half and beat de bareface spy out of Guyana.