Dem boys seh…Barbie get another contract

May 10, 2013 Dem Boys Seh, Features / Columnists, News

Guyana buying plenty TB drugs and dem boys ain’t got to worry about who getting de contract. Dem didn’t know that dem had so much TB in Guyana, but like is everybody got, suh dem buying more than $30 million.
When de Lunch Man mek de announcement dem boys start to wonder if between the HIV drugs and de TB drugs if somebody ain’t scamming more money to mek up fuh wha get cut from de budget. Was a time when de Ministry of Health boost up de number of people who got HIV and AIDS. This mek de country look bad, but it also mek dem big countries send in money. That was de whole idea fuh pushing up de figure.
When dem get ketch, dem claim how was poor checking. Now dem hustling wid de TB drugs. De specialists seh that TB is an opportunistic infection and it now coming from HIV and AIDS.  Dem boys seh that dem coming to de belief that Barbie wishing if de whole country get TB, because he gun get more rich.
Is de same thing wid some of dem road contract. People getting contract fuh do wuk and dem can hardly hold a spade. When dem mess up de wuk, de government does announce how it gun mek de contractor pay. This time de contractor done pay—but it pay people who collecting perks fuh pass on to dem big ones.
That is why Khemraj and all of dem asking fuh specifics fuh contracts before dem approve money. Dem see so much cockishness that dem don’t know what is genuine or what is de funnel fuh tek de money out of de treasury.
And dem boys still want to know who is de local people who invest in de Marriott. De hotel gone a far way and de people still don’t know who got money inside. De government was smart. It didn’t go to parliament fuh money out of de budget.
Some things still remain a secret.
Talk half and wait fuh see wha more drugs dem buying.