People now talking bout everything. Dem mouth open just like how dem eye open. When dem boys start fuh criticize de Marriott dem same people sit down and shut dem mouth. At one stage dem boys believe that de people did eat glue.
Then de people start fuh talk bout de money dem spending pun some new terminal at de airport. That was long after dem boys tell de whole country that money is not something to throw away, but dem people shut dem mouth. Some of dem talk how is better dem see a nice airport although nuff of dem would never go pun a plane.
But de Man above got a way of mekking people see sense from nonsense. Sometimes he does got to slap people fuh mek dem see de light. De other day he hand some of dem same big shot who don’t care if Christmas fall pun Good Friday a high tide that flood dem yard and house wid salt water. Dem complain.
One month barely pass and He promise to slap dem wid another high tide. That is wha mek dem now calling pun Donald fuh keep out de sea than to build hotel and airport. But Donald smart. He ain’t talking bout dem things in de city; he going to wheh he know dem got cane cutter and diehard people, but he ain’t gun tell dem bout de flood.
He ain’t even telling dem bout Ed Ahmad who sing till he get a US Senator fuh dance he way all de way before a judge. Is de same Ed Ahmad who did send some container of building material to Bharrat and de Man above know who else.
Dem boys seh that if Ed can do that to a Senator who did promise fuh help he get rid of all dem people who claim that he thief dem money, imagine wha he seh bout he friends in Guyana who ain’t do nutten but stretch out dem hand fuh perks.
And poor Donald still fighting to defend everybody, except Ed Ahmad. Of course Bharrat did disown Roger Khan. He claim that he didn’t even know de man, although he only meet him one or two time.
Talk half and wait fuh Donald dance some more.
Sep 22, 2019In overcast conditions at the Everest located a ‘stone’s throw’ from mighty Atlantic Ocean, day two activities in three-day Indigenous Heritage Games continued yesterday and climaxed late into...
By Sir Ronald Sanders “Hurricane Hell” and “The Bahamas is at war being attacked by Hurricane Dorian. And yet The... more
Editor’s Note, If your sent letter was not published and you felt its contents were valid and devoid of libel or personal attacks, please contact us by phone or email.
Feel free to send us your comments and/or criticisms.
Contact: 624-6456; 225-8452; 225-8458; 225-8463; 225-8465; 225-8473 or 225-8491.
Or by Email: [email protected] / [email protected]