Dem boys seh...Ah Kneel think he bigger than Donald

Dem boys seh…Ah Kneel think he bigger than Donald

Feb 08, 2013 Dem Boys Seh, Features / Columnists, News

Li’l children does crave nuff thing. Dem does crave Bar Bee doll, ice cream and some of dem does crave Bar Bee Rat. When dem get big, dem same people does crave wealth, publicity and fame. Ask Bar Bee, Brazzy, de Rat and de Bees. You can’t lef out Irfaat, Rob Earth and Shaatie.
Dem craving publicity because all of dem done get filthy rich and Uncle Donald know, but he keeping he mouth shut fuh now.
Ah Kneel Ganda Lall craving fuh power. De other day he claim how he got to tell Uncle Donald whether he can seh yes or no. He think he is Uncle Donald mouthpiece. He believe that when Uncle Donald was swearing in was he Ah Kneel was talking de words.
Like he start smelling he sweat and everything else. When de Rat was in de high chair Rob Earth use to behave and act just like he. He think he was running de country.
He get de siren fuh one day and he mek people cow run way. Nuff of dem animal jump in trench and dead. Dem boys know fuh sure that Uncle Donald ain’t gun mek that mistake wha de Rat mek. He would never give Ah Kneel even one hour wid de siren because people gun jump pun electric pole, jump in river, and others will jump in front of speeding vehicles.
He is one of dem who crave power but in that same kettle of fish some of dem crave li’l boys. Dem boys does peep dem in some of de dark spots in de country. Ask Brazzy. Dem boys got some pictures and a lot of other things too.
But when all is said and done some of dem who crave power end up mad. Thursday Rohee end up talking to heself in parliament. Ah Kneel was so sorry fuh de man that he prop sorrow. De rest of dem start fuh talk to one another.
Dem boys seh that if that is wha power does do to people dem don’t want it.
Talk half and wait to see who gun run mad.

Discover more from Kaieteur News

Subscribe to get the latest posts sent to your email.

Latest News