Dem boys seh…Three cheers fuh De Donald

Dec 12, 2012 Dem Boys Seh, Features / Columnists, News

When Easy Come Easy Go land pun de scene it come wid low fares and a promise to help Guyanese. But that was only part of de plan.
That was de sugar pun de bitter pill because de owners had dem own plan. In fact, dem boys seh that couple of dem East Come Easy Go people sit down and wuk out de scheme fine, fine. De aim was to be de flag carrier and that mean money.
De Donald hear dem whispering. He even hear dem plan fuh put money in Easy Come Easy Go suh that it could fly again. That woulda been de big catch. Dem woulda get de flag carrier status fly fuh three more weeks and then collapse de airline.
Then dem woulda do wha Fip do—sell de rights fuh nuff money. And indeed if Easy Come Easy Go did get de flag carrier thing it coulda sell it fuh at least US$50 million. Then everybody woulda split de money and smile.
De Donald deserve a big cheer. He ketch dem talking and while dem planning he call de Trinidad plane people and give dem de flag carrier status. Well now is one row. Brazzy frighten fuh ask if de people pay because De Donald want to know if he pay in he money to de public treasury.
Other people vex because dem see de US$50 million fly away. Barbie vex because he can’t get back he investment wha he put de first time. But is only greedy people does get vex two time—when people tek dem thing and when dem ain’t get people thing.
That’s why two leaders now facing jail. One of dem still serving and de other one lef office de other day. Now nobody can’t picture a serving president or even Minister getting charge fuh anything.
If people coulda charge dem some woulda deh in jail and de prison people woulda throw away de key. That is why dem boys does always seh that Guyana is Gool; nutten can’t happen to de government people and dem friends.
And while all this happening, Kwame quiet. A nice thing happen to him. One Bartica man call he Miss Kwame.
Talk half and cheer De Donald!