Dem boys seh…Wanted bulletin mek you end up dead

Nov 09, 2012 Dem Boys Seh, Features / Columnists, News

 
Greed has no limit. Man does sell he wife fuh a few dollar. Mankind does guh to any length fuh money. Some does use gun and knife fuh rob people, some does even thief wid balanjay.
But officials does thief more than dem ordinary criminal. Dem does thief by de millions and billions through projects and dem kantractas. Dem boys seh that if dem can inflate price fuh some li’l thing like de NIS building wha worth $15 million to $69 million; dem inflate de hotel wha worth US$20 million to US$60 million; dem inflate de hydroseed wha worth US$450 million to US$900 million; dem inflate $15 million koker to $100 million; dem inflate drugs (and not cocaine or ganja) wha worth $40 million to $260 million.
This is wha dem boys can see and check. Dem boys seh just imagine wha dem boys can’t see and wha dem can’t check—things like road, sea defences, digging and dredging.
Dem seh that dem does clear bush and build bridge in backdam. Dem seh that dem does build dem bridge fuh man, but dem really does build dem bridge fuh monkey. Obviously dem tek de whole of Guyana fuh monkey. Dem deh pun monkey business.
De police deh pun monkey business, too. Every day dem does put out wanted bulletin fuh people and when de people tun up and dem loose dem, other people does shoot and kill dem. Ask Rodrigues and Trini.
Now dem want Uncle Paul. Uncle Paul seh that he ain’t going nowhere. Nobody don’t want to go to CID no more. If Seelall and Brumell put out wanted bulletin fuh Adam, Glenn and Donald dem ain’t going too.
Talk half and watch dem inflated contract.