Dem boys seh...Nothing does hide fuh long

Dem boys seh…Nothing does hide fuh long

Oct 20, 2012 Dem Boys Seh, Features / Columnists, News

Guyana full of secrecy especially in de area of thiefing. Dem had a field day plus year wid secrecy at de Tender Board. Some of dem who deh pun de Tender Board believe in secrecy till dem stop reporters from tekking out dem photo. Dem use to hide and duck.
There was Donald DeClou. Is only de other day dem boys from de Waterfalls papers manage fuh get he photo. Is only when dem force he to go to Hen See Hen fuh a debate that dem boys manage fuh get he photo.
Bobby Ramroop use to hide from de camera. But dem boys manage fuh get he own nuff time because as dem seh, you can run but you can’t hide.
De tender bids use to be secret till de Waterfalls paper decide fuh watch every single tender. Is suh a lot of things start fuh skin up and shame some people. De public never had a chance fuh know how some people use to bid.
That same visit to de Tender Board mek dem boys know bout de bid fuh de malaria drugs but that is another story.
Dem boys seh that nuff deals mek in secret. Property sell in secret. A man sell Ministry of Home Affairs vehicle and he use de money in secret. He deh in court in public though because de secret come out.
Jagdeo use to lef de country in secret and people only use to know when he come back. Sanata complex sell in secret too and is only when de Waterfalls paper find out that de country know that instead of a portion Ramroop end up wid all.
More things gun come out because wha happen in darkness does come to light.
Talk half and wait fuh de secret to buss out.