Dem boys seh…Donald: kick dem around yuh, and den kick yuh damn self

Aug 17, 2012 Dem Boys Seh, Features / Columnists, News

Well so much ah ting happenin’ dem boys confuse.
Everyting start wid Uncle Freddie, de chief protester. He talk a set ah ting at de Stabroek Market Square at a meeting and had everybody laughin’ and biggin’ he up. After dat he decide fuh breeze out by Parliament Building at a vigil.
Dis man know he is a frighten man and he doan want deh pun de road when dem jumbie come out. He does always tuck in by eight o’clock de latest. Fuh some reason he choose fuh stand up outside Parliament till midnight, like if he is de Speaker.
Well he pick de wrang night. A fancy jeep circle de place bout forty time, and people seh dat look funny. Uncle Freddie ent want nobody know he frighten, suh he start fuh puff up he chest.
When everybody ready fuh cut out, Uncle Freddie walk in de middle, but people start fuh branch off, and he lef by heself. Dat was when de action start.
A strong man jump out from de jeep dat been circlin’ and run to Uncle Freddie. De man pelt a cuff and Uncle Freddie barely move he face, but he headback lef’ out and it get top-up like is a cell phone.
De man throw bout eight mo’ cuff fast, fast, but Uncle Freddie bob and weave like a Olympic boxer. All miss. Uncle Freddie start holla and de cuff man lef’ stupidy. He loose Uncle Freddie and speed out de place.
Dat is just like Uncle Donald. He finally get up to Linden, but nobody ent see he! He walk wid forty people – Gale de Sharer, Hammer man Benn, Old Dinga, De five Geenuh staff wha lef’, twelve bodyguard, and twenty soldier in two pick-up. But only sixteen Linden people come out and twelve had picket. Uncle Donald should kick dem advisors around he, and den kick he damn self fuh being so stupid.
Dem boys shame. But dat wasn’t all.
Uncle Donald ask wha happen wid all dem big wood wha’ been cross de bridge. De people tell he dat if he did come since last month he woulda see dat. He ask wheh de Regional Chairman Sharma deh. Is den he remember dat he ent tell de man dat he going to Linden. And dey meet couple hour before!
Gale de Sharer tell he dat is okay because Geenuh could always find a picture wid Sharma and stick he next to Uncle Donald like if de two ah dem move together in de town like buddy padna.
Is dem kinda bareface move de Rat use pun people when dem did want fuh debate he. De scampishness could never done.
Talk half and stop bobbin’ and weavin’.