Dem boys seh…Two more stooge come out wid more scampishness

Jun 20, 2012 Dem Boys Seh, Features / Columnists, News

After fame is shame. Jagdeo know good ‘bout that. Now a days he does down he head and walk. Dem boys seh none amount of soap, soap powder or body wash can wash way he shame.
Nuff of he friends ain’t got no shame, it seem so.  Dem boys know who write de statement fuh de drug company. But then again, it could be that de drug company put word in dem mouth because two stooge and de drug company sing de same song.
Dem talk ‘bout free storage. Is like a man and a woman who mek a pickney and then tell de whole country how dem minding de pickney fuh free. First, dem stooge along wid de Rat, tell de drug company fuh build a cold facility and a storage facility. Dem stooge didn’t see it fit to build de storage fuh de country. But dem bin know how fuh buy hydroclave and can’t tell de nation up to now how much de thing really cost.
Dem was de same people who seh that de hydroclave cost suh much and when dem boys talk dem run and put back some of de money and change dem mouth how dem didn’t spend suh much.
Now dem saying that a man got storage and because of de storage that is one of de main reason to give he de contract.
Dem boys at de Waterfalls paper got water and storage because that argument that dem stooge give can’t hold water. Dem boys want remind de nation that is de same property, de Sanata Complex, which is de people own, dem mek into a warehouse and cold storage.
Dem boys don’t know if he pay fuh de place yet. Dem stooge should tell de nation if he pay, who he pay, when he pay and how much he pay.
Dem stooge sound suh shameless that de Waterfalls boss man want meet wid dem pun TV fuh discuss de same skullduggery that going on. He seh that he gun pay fuh de programme but de programme must be live, not that crap wha dem tape, doctor and then play fuh confuse de nation.
Talk half and plan more tricks fuh de nation.