Dem boys seh... Dem boys call out de security

Dem boys seh… Dem boys call out de security

Jul 28, 2011 Dem Boys Seh, Features / Columnists, News

When a man protest too much dem people does seh that he guilty. If he keep he mouth shut dem does also seh that he guilty.
Shaik decide that he gun protest suh he go to all dem press conference since de computer story break.
Things was going good, though. Dem boys seh that when he decide to put computer in schools he had a good plan. And he get de idea when some white people come and live in de Rupununi.
Dem boys seh that dem people bring in some computer and Shaik ask fuh five. He get dem too. Dem boys want fuh know if dem in de school system.
Then he get 400 from dem friends in Canada. Suh, according to dem boys, he suppose to get 405 computers. Is de number got he confused and that is why he and Neil always clashing.
He mek some statement and Neil challenge. Dem boys want to know why he ain’t let de Sukhu boy defend heself. Why Shaik doing this is wha got dem boys raising dem eyebrow.
Now dem want to know if he is de Minister that got share in de company because even Ash Knee ain’t wasting time to defend de issue. He know that something wrang because when de Waterfalls paper find something that thing does got meat.
Anyhow, dem boys seh that Neil go to watch heself because de state done show that dem intend to lock he up fuh asking too much question.
But dem boys seh that something strange happening. De records fuh some places disappear. Dem boys want fuh know if is normal fuh files to go missing.
Talking bout missing, dem boys seh that dem want to know if certain people deh in de country. Dem ain’t hearing and dem ain’t seeing. Perhaps dem investigating too.
Talk half. Lef half.