Dem boys seh….Bharrat gone to India fuh de stone

Jan 31, 2011 Dem Boys Seh, Features / Columnists, News 0

De hospital don’t have no treatment fuh snake bite. That mean if a real poisonous snake bite you don’t waste money to go to hospital.
Just lie down home and wait fuh death unless you feel de hospital gun kill you faster.
But this wasn’t always de case. Long time dem old Indian people had a black stone that when snake bite dem, all dem had to do was put de stone pun de spot wheh de snake bite and it use to suck out de poison. Was a black stone. It had a funny name.
When that lady dead last week and lef she fourteen pickney, Bharrat decide that he had to go to India to get that stone. He lef over de weekend and dem boys sure that when he come back nobody gun ever die from snake bite again. He coming wid de stone.
Dem boys seh that de man know a lot bout stone. He know that dem had a stone that dem man who like to last long would use.
That was a bad stone and nuff people suffer in more ways than one.
Bharrat also know that India got de best marble stone. Dem boys seh that he bringing back nuff of that.
After all, he building he house and de man got class. It does tek three months fuh a ship to travel from India to Guyana and indeed, de man house gun be ready fuh de marble in three months.
If dem think de Taj Mahal got marble, dem gun have to come to Guyana in couple months. India is de land of marble and stone and Bharrat know that.
Dem boys seh that he family who live deh call and tell he to buy some. Dem even tell he bout de snake stone. He gun get that free. That is wha dem boys seh.
When he come back, people gun really know how de man great and how de man love beauty. Wid de Indian marble he house gun be a place of beauty—a wonder of de world. That is wha dem boys seh.
Talk half. Lef half.