Dem boys seh….De day de top cop holler ‘Balls’

Dec 19, 2010 Dem Boys Seh, Features / Columnists, News 0

De police warn dem that whenever big shows coming to Guyana de thieves does come out. Dem men want money because dem got to go to de show. But nobody ain’t listen.
Last night dem had Beenie Man, Destra and a whole heap of people. Dem bandits strike all over de place.
Three of dem who try a thing in de city get ketch because people run dem down. Last night dem couldn’t see de show and dem gun have to spend Christmas in close confinement.
But wha mek dem boys smile is de set who play police and set up a roadblock. Cars stop and of course dem police rob all of dem. And nobody behind realize that de one in front getting rob.
A Chinee man cook shop get lick up and de goldsmith lose what he was selling and what he was wearing. De police chief holler—”Balls” and dem boys reply, “We know. After all was men do de robbery.”
Henry seh that is people like that he want in de force and dem boys seh that dem know because dem does see people like that in de force all de time.
Dem boys seh that all de years dem living dem know that Christmas is a time for giving. Dem never realize that is a time for tekking.
Talk half. Lef half.