Dem boys seh… Who seh blackout done?

Oct 30, 2010 Dem Boys Seh, Features / Columnists, News

Last year, when de government and GPL commission de Kingston Power plant dem boast how dem got surplus capacity and that blackout gun be a thing of de past. Dem boys put dem knee pun de ground and give praise because nuff time when dem enjoying something, de lights does disappear and dem boys blood pressure does go up.
That is why dem was happy. But all of a sudden dem start fuh cry again. Is blackout like fuss time. Dem want to know why dem two Bharrat lie to dem. Bharrat Dindyal was de fuss one to talk bout de power. Bharrat Jagdeo just follow he and end up fooling people.
Now dem same two men talking about more money—nuff more money—fuh give we de same current and to avoid de same blackout that dem seh was a thing of de past.
Well dem boys now understand what people mean when dem seh that Guyana living in de past. And it really living in de past. It past redemption.
Now dem boys money got to buy another set of engines because Fip done gone wid some and no power ain’t coming.
Talk half. Lef half.