Dem boys seh …Hotel try fuh mek foreign women sex slaves

Jun 15, 2010 Dem Boys Seh, Features / Columnists

When people go to a strange place dem like to walk about suh that when dem lef dem can seh that dem see de place.
People does go pun vacation just fuh walk li’l bit and tell de world that dem been here or dem been there.
Well dem foreigner who running de Princess Hotel decide that all dem foreign dancers who wukking wid dem must not talk to de locals. Dem can’t even leave de hotel by demselves.
Some want to go and shop and dem can’t go without watchman. But wha surprise dem boys was when dem find out that de foreign people tell dem same foreign gyal that de people who live in Guyana are savages and that dem does eat foreigners.
Dem foreign gyal didn’t believe but dem glad fuh de wuk because of de pay suh dem stay in dem corner till something happen. Dem boys find out that de foreign bosses want hanky panky wid dem gyal. According to dem foreign gyal de foreign boss think that dem bring dem as sex slaves.
Well dem gyal object and was big story. De foreigners suck dem teeth and wid immediate effect, dem threaten to send dem packing. Dem gyal call de bluff and start fuh mix wid some locals.
Talk half. Lef half.