Dem boys seh…..De weather radar spoil

Jun 07, 2010 Dem Boys Seh, Features / Columnists, News

Something wrang wid de radar. And dem boys ain’t talking about de radar that does see plane and guide dem to de airport. Dem talking bout de weather radar.

De thing promise nuff rain and poor Robert go and beg Bharrat fuh a heap of money to dig drains fuh collect de water from de heavy rain.

Robert end up in some trouble but dem boys seh that he was expecting it. He mek big statement that people should watch fuh see who wukking and to demand quality wuk. Well people can see a drain dig good but dem never know de cost.

However, dem got some communities that got people waiting fuh keep an eye on de project but no project ain’t meet by dem.

And wuss yet was that when de li’l rain fall it flood dem out. It mek dem boys ask Robert fuh explain wheh he spend de money and how much he really spend. Robert still to answer.

But is de radar got to blame because it talk bout rain and hardly any fall. De place more hot than a baker shop oven and dem people who does ketch rain water want to know when dem tank gun full.

But de story get sweet. Dem boys seh that Robert call Leslie and ask he fuh fog de place because of de mosquito that settle in dem place wheh de water settle, wheh Robert refuse to dig a drain fuh cater fuh flooding.

But Leslie smart. He ask fuh he own money to execute he project. Dem boys seh that Leslie would execute any project. He gun kill it once he ain’t come up wid de idea.

One thing fuh sure. Dem boys seh that Fip done execute de Amaila Falls road.

Talk half. Lef half.