Dem boys seh… Guyana is a graveyard fuh some people

Feb 19, 2010 Dem Boys Seh, Features / Columnists 0

First was Roger Khan, then was Simels, now is Kerik. But before that dem have de local things.
News does come out of de prisons like how water does pass through pipe. Dem boys seh that de boss man does mek sure that de prisoners don’t get to use de telephones but de news does still get out.
One man tell Dale, de Prison Boss, that he believe that de prisoners does use carrier pigeon. He claim that dem does release de pigeons through de bars wid all de happenings inside the jail.
Of course de people who control de jail get vex because dem boys talk bout de food that get smuggle out. Yesterday dem decide to search de jail. Dem call de whole police force and de fire service wid some long ladder and dem even call de army.
Dem ketch a man wid three $10 coin; dem ketch one wid a piece of cigarette and dem ketch one wid a spoon. Dem didn’t find no cell phone, no jukka, no weapon of any kind and all dem boys know that de jail got everything, from phone to gun.
Solomon had a jukka when he kill a man in de same jail.
Anyhow, some people crying. A man who was coming fuh be de security chief gone to jail for four years in New York. This man was police commissioner in New York and even security adviser in Trinidad.
Dem boys seh that dem would never see some old commissioner going to jail in Guyana. But then again, Guyana ain’t New York. But Guyanese sympathetic. Bharrat might send a sympathy card to Bernard Kerik, de new jailbird.
Talk half. Lef half.