Dem boys seh....Bharrat really smart

Dem boys seh….Bharrat really smart

Jan 24, 2010 Dem Boys Seh, Features / Columnists, News

Life hard. When dem reporters ask some big ones fuh answers dem same big ones don’t talk. But let de reporter write something bout de same thing that he ask about; and let he mek one mistake, dem same big one does suddenly open dem mouth to point out de mistake.

Dem boys seh that these days dem Government Ministers operating pun remote control. Dem only giving answers when de reporter expose some story.

Well dem boys want to know how de government does select who gun act and when. De last time dem claim how was musical chairs. Nobody didn’t respond because Bharrat ain’t tell dem what to say.

But as soon as he come dem reporters intend to raise up de story. De man in de street does use that acting thing to determine seniority in de party. At one time dem actually believe that Carolyn was senior to de others because she act fuh Sam Hinds.

Then Robeson act and now Robert. Why Ramson never act? Why Peck never act? Why Ashni never act?

Dem boys also looking at how dem contract dry up. Robert mek a big announcement how Guyana gearing fuh de rain that woulda fall in record numbers. He spend money fuh dig drain and things like that. He even get de Met Office fuh predict rain.

Which ever obeah man dem use fail dem because de rain ain’t come. And dem pay good money. Is de same money that dem was to pay de teachers and sugar workers. Is now dem people understand why de government couldn’t pay.

And dem have de Haiti thing. Bharrat cussing de US and he do de cussing in Iran which don’t like de US. Dem boys want to know if he woulda do de same thing if he was in England.

But dem have a reason fuh de cussing. Once he cuss Uncle Sam dem gun get vex and stop giving Guyanese any visa. That mean that people gun have to stay home. That mean that de li’l bit skills that de country have will remain here.

No tricks. No living.

Talk half. Lef half.