Latest update April 24th, 2024 12:59 AM
Oct 10, 2008 Dem Boys Seh, Features / Columnists
Mash round de corner and from de way how some people behaving it look like if Mash gun come before Christmas. De organizers plan a launching and then dem tramp down Main Street chanting how this year dem have to Mash in a straight line in 2009.
Dem boys hear de music outside de Ministry of Culture and like how people does always behave whenever dem hear bout tramp, dem stand up at de side of the road. Then de few people wrap up demself in sheet and things like that fuh tramp to de Umana Yana.
De tramp was nice and de water that dem give de people when dem done come from Banks DIH but was de speech that hut everybody.
De one who name Minister Frank start fuh talk how he ain’t want too much old people fuh Mash down de road. He want young blood.
Well two gunman tun up and ask he how much blood he want and how much he paying. Is then he realize that things real bad and that people tekking wha he seh real serious.
Next year de Soca and calypso competition gun have some young bandits singing how somebody got fuh dead. Dem gun also have a GDF posse singing how dem young gunman got fuh dead but only if somebody put up a reward. De competition gun be hot.
And then dem gun have another problem when is time fuh pay de winners dem prizes. That is a problem wid de Culture Ministry.
But dem boys seh that dem glad because it expose a case of do suh nah like suh. One of de people who picket de Ministry de other day owe nuff people but that person ain’t like nobody owe dem.
Imagine a man owe some people who act in he play and he got de nerve to tell de Culture Ministry how de Ministry got fuh pay he because he got fuh pay people. Wha happen to de money from de play?
That story mek de papers. Dem have a couple papers that does print every day in de country. People does read some and de vendors does really try fuh sell de others.
Dem boys ask a vendor how he does mek out wid four set of newspaper and de vendor seh how it hard because two paper does sell fast but is de rest that does keep dem pun de road.
One of de paper is dead weight because it ain’t moving at all. Dem boys report how de vendors actually seh that at one time was only one dead weight dem had to contend with. Now is two.
But that ain’t de only dead weight. A man from Israel come to Guyana because he want to go to Venezuela. Three man rob and strip he naked and mek de poor man hide behind de seawall till night fall.
De man hear de loud music and end up at State House gate when de PPP was celebrating 16 years of entering government after October 5. Dem call it return of democracy, dem boys call it return of de man from de sea.
De Israeli can barely talk English but somehow he manage to mek de guard dem understand wha happen to he. He show dem sign; cuff and choke and kick.
Dem had to give he clothes. Dem give he a shirt from Bharrat, and one from Ashni; a pants from Robert and one from Manny. De man refuse one from Brassy.
He seh that he deh bad but not so bad that he got to wear something suh big that it could fit an elephant. De man still in Guyana.
And just how dem three bandits mek a profit, GPL mekking profit too. De company got a way to mek money. It start charging people fuh power by de day. Everyday de consumer got to pay a fixed rate, whether he get current or not.
Well dem boys seh that GPL got to be doing that because although dem have all that blackout de light bill is de same and sometimes even bigger than when people getting regular current.
People get real vex de other day and dem threaten some managers. Right away two of dem pack up dem traps and run to Canada. Another one go de States and one go back to Trinidad. Nobody ain’t want de manager wuk anymore.
Dem boys waiting fuh this month light bill because dem really had to deal wid blackout. One time dem was watching a nice movie when suddenly de lights gone.
At de same time de hero in de movie was about to rescue de star lady. To this day dem boys ain’t know wha happen, how de movie end.
Wha dem know is that some man tek Dr Walter compressor fuh scrap metal and nearly sell it. Poor Dr Walter couldn’t wuk he air conditioner. Dem boys want to know how he was caring fuh de compressor suh that it look like scrap.
Talk half. Lef half.
LISTEN HOW JAGDEO WILL MAKE ALL GUYANESE RICH!!!
Apr 24, 2024
Round 2 GFF Women’s League Division One Kaieteur Sports – The Guyana Police Force FC on Saturday last demolished Pakuri Jaguars FC with a 17 – 0 goal blitz at the Guyana Football...Kaieteur News – Just recently, the PPC determined that it does not have the authority to vitiate a contract which was... more
By Sir Ronald Sanders Waterfalls Magazine – On April 10, the Permanent Council of the Organization of American States... more
Freedom of speech is our core value at Kaieteur News. If the letter/e-mail you sent was not published, and you believe that its contents were not libellous, let us know, please contact us by phone or email.
Feel free to send us your comments and/or criticisms.
Contact: 624-6456; 225-8452; 225-8458; 225-8463; 225-8465; 225-8473 or 225-8491.
Or by Email: [email protected] / [email protected]