De motto of de police is ‘Protect and Serve’. Dem always protecting somebody and serving somebody else.
Dem does go suh far as to serve summons. De other day a policeman stand up at de traffic light fuh ketch all dem car that break de law.
A foreigner seh that she admire how de traffic cop was protecting de rest of society from careless drivers.
Dem boys seh that she didn’t know that de cop was protecting he interest. He have a gyal who like eat Chinee food and if he ain’t got money then somebody gun buy de Chinee food and de policeman gun lose he woman.
Yesterday, some police go to de Camp Street jail to collect prisoners who had to go to de Wales Magistrate’s Court. If you see dem wid dem gun and thing. Old people does seh that dem armed to de teeth.
When dem reach Wales dem carry some prisoner name Glen to court. De magistrate refuse bail and tell de police fuh carry Glen back to de lock ups.
Dem barely walk down de step when Glen pelt a shot. He run up de back dam road and a police man start fuh chase.
Glen look back and see de police man dress up to death. He pants had a seam that coulda cut. He shirt sleeve also had a still seam. He had some change in he pocket and he cell phone in another one.
Suh when Glen jump inside de trench de policeman decide to serve one master—heself. And he protect he clothes and he cell phone and he shine boots.
Glen gone like acouri but that is not de whole story. If you see all dem police man who come fuh search fuh Glen. All of dem got big gun but none of dem was going in de trench.
Dem had to protect dem clothes. Dem boys seh that dem get really vex because dem come to town and shoot a woman.
Some man walk to de jail wall and decide to throw something over de wall. A policeman see when he throw de thing and he challenge dem man. Dem boys seh that de man run.
De passion in he, de policeman ups he gun and shoot at de man. He knock a woman. Well that start one story.
People want to know if he is de best shooter in de force. Dem boys also want to know who he gun knock if some prisoner escape and he got to shoot.
He might knock everybody else except de prisoner who get away. That is wha dem boys seh.
But is not only de police got things like that. De other day dem boys walk down de road and dem see a robbery. Right away one go pun he cell phone to call de police while the other one decide that he gun hide and keep a watch to see wheh dem gun run.
De police never come till dem thief gone and then if you see de show of force. Dem boys seh that is only show.
Carifesta coming and dem have a big clean up campaign. Dem boys seh that is like de man who does only bathe when he going out. Wha dem want to know is why wait till things get suh bad that it got to tek all of this to clean up de place.
De cleaning shoulda be a regular feature and in any case, who dem fooling? Dem boys seh that de people who live here know how de place stay and some of de people who coming fuh Carifesta been coming here all de time and dem know how de place stay.
Imagine dem paint up Bourda Market fuh mek de stalls look bright. Dem boys want to know if de visitors ain’t gun smell de fresh paint.
One man painting signs like mad. He got one sign showing how much Guyanese got to pay fuh something and he got another showing how much foreigners got to pay.
Suh you got a pineapple and de sign normally read $500. When de tourist come, that same pine gun worth $5,000, which is US$25.
And check dem telephone calls. Right now when you buy credit it gun last a certain time. When is Carifesta, watch how de credit gun done quick. That is wha dem boys seh.
Talk half. Lef half.
Sep 24, 2020DERBY, England – Peaking at the right time. That is how West Indies Women’s new ball bowler Shakera Selman described her career after an impressive performance in the first T20 International...
The total number of coronavirus cases in Guyana stood at 2, 535 on Wednesday of which there are almost more than 1,000 active... more
Freedom of speech is our core value at Kaieteur News. If the letter/e-mail you sent was not published, and you believe that its contents were not libellous, let us know, please contact us by phone or email.
Feel free to send us your comments and/or criticisms.
Contact: 624-6456; 225-8452; 225-8458; 225-8463; 225-8465; 225-8473 or 225-8491.
Or by Email: [email protected] / [email protected]