Dem boys seh…People got to pope dem big ones parties
People like holler when de slightest thing happen. Was de season of birthdays and dem boys seh that dem gun pope all dem birthday parties. Dem start fuh listen to all dem radio announcements and dem hear that Bharrat get a party.
Well dem expect to get an invite. None ain’t come. Dem decide that dem can pope suh dem travel to Plaisance. Some of dem get in and dem lef wid dem mouth open. De house look like a palace wha dem Arab rich people does got.
Food lick dog. New Thriving supply food like how rain does provide water. Bharrat put out de works but was de next day that New Thriving had problem. Is a good thing dem Bees got money because Bharrat seh that he wasn’t paying.
Fuh four days is different people tun up and all of dem talk bout different food.
De next birthday dem boys plan fuh tackle was Uncle Donald own but that couldn’t happen. Uncle Donald don’t eat pork suh he wasn’t prepared to use New Thriving. And dem boys didn’t enjoy de pastries and mash potato.
Well Uncle Adam had he party de other night. He mek it easy because he buy fry chicken. He didn’t cater fu hem Rasta. He had to go back to New Thriving and buy ordinary and meatless fry rice. When that come de Rasta people claim how dem had to go home. De food lef.
De drinks flow but people got a way of telling dem system not to shut down. De result was that de cleaners had to clean urine from places wheh people shoulda control dem system. That is why people now claiming that when city council strike dem gun get Uncle Adam to host a party. De sanitation system wouldn’t have to work.
But Uncle Glenn seh that Uncle Adam cannot hold any more drinking sessions.
Talk half and watch de urine.